पहुरा | २५ कार्तिक २०७८, बिहीबार
कुवाँर महिनामे १४३ लैङिक हिंसा, ८४ ठो घरेलु हिंसा
पहुरा समाचारदाता
धनगढी, २५ कार्तिक ।
महिलाहुक्रे घरभिटरसे सबसे ढेर सुरक्षा तथा माया पाई पर्ना हो मने उ ठाउँमे सबसे ढेर असुरक्षित रहल एक तथ्याङकसे डेखल बा ।
ओरेक नेपालसे अभिलेखीकरण करल गैल कुवाँर महिनाके तथ्याङकहे विश्लेषण करेबेर ८४ ठो (५९ प्रतिशत) घरेलु हिंसाके तथ्याङक संकलन हुइल कार्यकारी निर्देशक लुभराज न्यौपाने बटैलै । उहाँ ओरेकसे कुवाँर महिनामे महिला उप्पर हुइल हिंसाके मासिक प्रतिवेदन सार्वजनिक करटी अपन कार्यालयमे अभिलेखिकरण करल ११० ओ टमान राष्ट्रिय पत्रपत्रिकासे प्राप्त ३३ घटनाके आधारमे १ सय ४३ ठो लैङिक विभेदमे आधारित हिंसाके तथ्याङक अभिलेखिकरण हुइल जनैलै ।
अभिलेखीकरण करल तथ्याङकहे विश्लेषण करेबेर कुवाँर महिनामे सबसे ढेर ८४ ठो (५९ प्रतिशत) घरेलु हिंसाके तथ्याङक संकलन हुइल कार्यकारी निर्देशक न्यौपाने बटैलै । ओस्टेक करके २१ ठो (१५ प्रतिशत) बलात्कारके तथ्याङक संकलन हुइल बा । ११ ठो (८ प्रतिशत) हत्याके घटना, ९ ठो (६ प्रतिशत) सामाजिक हिंसाके घटना, ८ ठो (६ प्रतिशत) यौन दुव्र्यवहारके घटना उहाँ जनैलै ।
ओस्टेक करके ४ ठो (३ प्रतिशत) आत्महत्याके घटना संकलन हुइल बा । कलेसे २ ठो (१.४ प्रतिशत) मानव वेचविखनके घटना,ं २ ठो (१ प्रतिशत) मन्से १ ठो हेराइल अवस्थामे फेला परल घटना ओ १ ठो एसिड आक्रमणके घटना संकलन हुइल ओरेक नेपाल जनैले बा । १ ठो (०.७ प्रतिशत) हत्या प्रयास ओ १ ठो (०.७ प्रतिशत) मानव वेचविखनके प्रयास जैसिन जधन्य अपराधके तथ्याँक संकलन हुइल बा ।
प्रभावितके उमेरके आधारमे वर्गीकरण उमेरके आधारमे विश्लेषण करेबेर कुवाँर महिनामे केल सबसे ढेर ५८ जाने (४१ प्रतिशत) २६ से ३५ वर्ष उमेर समूहके महिला ढेर हिंसमे रहल पाइल बा । ३६ जाने (२५ प्रतिशत) १७ से २५ वर्ष उमेर समुहके युवा महिला, २० जाने (१४ प्रतिशत) ३६ से ४५ वर्ष उमेर समुहके महिला, १८ जाने (१३ प्रतिशत) १६ बर्षसे कम उमेरके बालिका तथा किशोरी बटै ।
ओस्टेक ८ जाने (६ प्रतिशत) ४६ से ५५ उमेर समुहके महिला, ३ जाने (२ प्रतिशत) ५६ वर्षसे उप्पर उमेर समुहके महिला हिंसाके जोखिममे रहल ओरेक तथ्याङकमे पाइल बा ।
प्रभावित ओ आरोपितके सम्बन्धहे विश्लेषण करेबेर कुवाँर महिनामे सबसे ढेर ७६ ठो (५३ प्रतिशत) हिंसा गोसियासे हुइल बा कलेसे २७ ठो १९ प्रतिशत हिंसाके घटना परिवारके सदस्यसे हुइल बा ।
२३ ठो (१६ प्रतिशत) छिमेकीसे, ७ ठो (५ प्रतिशत) हिंसा प्रेमीसे, ४ ठो (३ प्रतिशत) हिंसा संघरीयासे, २ ठो (१ प्रतिशत, सेवा प्रदायकसे, २ ठो (१ प्रतिशत) शिक्षकसे, १ ठो (०.७ प्रतिशत) अविवाहित मने संगे बैठल व्यक्तिसे, १ ठो १ प्रतिशत हिंसाके घटना अपरिचित व्यक्तिसे हुइल महिला पुनस्र्थापना केन्द्र, ओरेकके तथ्याङकमे पाइल बा ।
कार्यकारी निर्देशक न्यौपाने कहलै, –‘तथ्याङकहे आधार मन्लेसे अघिल्का महिना जस्टे महिला अपन घरेफे ढेर जोखिमा रहल पाइल बा । ३५ वर्षसे कम उमेर समुहके बालिका, किशोरी तथा महिला हिंसासे सबसे ढेर प्रभावित रहल बटै, १७ से ३५ वर्ष समुहके युवा हिंसाके प्रमुख जिम्मेवार रहल पाइल बा ।’
महिला उप्पर हुइना हिंसा रोकथाम कैना सक्कु महिला तथा मानव अधिकारके लाग क्रियाशील व्यक्ति, नागरिक समाज, राजनीतिक एवं समाजिक संघसंगठन ओ समुदायगत आवाजके सहकार्य, साझेदारीताके खाँचो रहल कार्यकारी निर्देशक बटैठै ।
महिला पुनस्र्थापना केन्द्र, ओरेकसे महिला हिंसारहित जीवन यापनके लाग पैरवी कैना तथ्यगत माध्यम घटना अभिलेखन ओ प्रकाशनहे प्राथमिकताके साथ केन्द्र, जिल्ला तथा परियोजना कार्यालयमे तथ्याङक व्यवस्थापनके काम करटी बा ।