पहुरा समाचारदाता
धनगढी, ५ वैशाख । नेपालके संविधानके धारा ३८ के उपधारा ४ मे मौलिक हकमे रुपमे व्यवस्था करल अनुसार राज्यके सक्कु संरचनामे महिलाके समानुपातिक समावेशी नेतृत्व सुनिश्चितताके माग कैगिल बा ।
ओरेकके संयोजकत्वमे ७३ ठो संघ संस्था ओ सामुदायिक समूह तथा सञ्जालहुक्रे केन्द्रिय तहके प्रमुख राजनीतिक दलहे ७ बुँदे मागसहितके ध्यानाकर्षण पत्र बुझैटी राज्यके सक्कु संरचनामे महिलाके समानुपातिक समावेशी नेतृत्व सुनिश्चितताके माग कैगिल हो ।
ध्यानाकर्षण पत्रमे महिला, महिलाभिटरके विविधताहे (दलित, जनजाति, यौनिक तथा लैंगिक अल्पसंख्यक, अपागंता आदि) सम्मान, स्वीकार करके उहे अनुसारके सहभागिता, निर्णायक तहमे प्रतिनिधित्व सुनिश्चित कैना माग करल बा । चुनाव प्रचारप्रसारके क्रमे हुइना आर्थिक अनियमिततासे महिलाहे स्वतस्फुर्त रुपमे चुनावी प्रतिस्पर्धामे अइना कठिन हुइना ओरसे सक्कु राजनीतिक दलसे उ संंग सम्बन्धित निर्वाचन आचारसंहिताके पुर्ण रुपसे पालना करके महिलाके नेतृत्वहे प्रोत्साहन करटी चुनावहे निश्पक्ष ओ मितव्ययी बनैना माग करल बा ।
चुनावी दौरानमे कौनोफे महिलाके नेतृत्वहे ओइनके यौनिकतासंग जोरके लगैना चारित्रिक आरोप, लाञ्छना जैसिन कार्य पूर्ण रुपमे निषेध हुइना वातावरण निर्माण करे पर्ना, उ बाट हरेक राजनीतिक पार्टीसे अपन आचार संहितामे स्पष्ट रुपमे उल्लेख करे पर्ना, कहु कौनो कार्यकर्तासे हुइल जानकारी आईबेर उ कार्यमे संलग्न पार्टी नेतृत्व तथा कार्यकर्ताहे सक्कु जे पत्ता पैना करके अबिलम्ब कारवाही करे पर्ना माग करल बा ।
राजनीतिक दलसे अपने चुनावी घोषणापत्रमे भूमीहीन, सुकुम्बासी तथा अव्यवस्थित समुदायके महिलाहुकनके आत्मसम्मानपुर्वक जीवनयापन करेक लाग भूमी ओ बास अधिकारके मौलिक हकहे योजनावद्ध रुपमे कार्यान्वयन कैना योजना सार्वजनिक करे पर्ना ध्यानाकर्षण पत्रमे उल्लेख करल बा ।
समुदाय तहसे घरेलु श्रम लगायत अनौपचारिक क्षेत्रमे कार्यरत महिला श्रमिकहुकनके श्रमके पहिचान, मूल्याङकन सम्मान करटी सूचिकरण कर्ना प्रतिवद्धता सार्वजनिक करे पर्ना, राजनीतिक दलसे अपन चुनावी घोषणापत्रमे महिला, बालबालिका तथा किशोरीहुकनके सवालहे राजनीतिक सवालके रुपमे स्पष्ट उल्लेख करके प्रभावकारी कार्यान्वयनके लाग पहल करे पर्ना ध्यानाकर्षण पत्र मार्फत माग करल बा ।
ध्यानाकर्षणपत्र नेपाल कम्युनिस्ट पार्टी (एमाले), नेकपा कम्युनिस्ट पार्टी ( माओवादी केन्द्र), नेपाल कम्युनिस्ट पार्टी (एकीकृत समाजवादी), नेपाली काँग्रेस, समाजवादी पार्टी नेपाल, राष्ट्रिय प्रजातन्त्र पार्टीहे बुझाइल ओरेक नेपालके कार्यकारी निर्देशक लुभराज न्यौपाने बटैलै ।