ओरेक नेपालले सन् २००८ देखि महिलामाथि भइरहेको हिंसाको यथार्र्थ प्रस्तुत गर्ने मुख्य उद्देश्यले हरेक वर्ष महिला हिंसाविरुद्धको वर्ष–पुस्तक अन्वेषी प्रकाशन गर्दै आइरहेको छ । अन्वेषी २०७५ मा जुलाई २०१७ देखि जुन २०१८ सम्म ओरेक नेपालमा अभिलेख गरिएका जम्मा १७४१ वटा महिलामाथि भएका हिंसाका घटनाहरूको विस्तृत विश्लेषण गरिएको छ ।
क) घरेलु हिंसा
ओरेक नेपालले यस वर्ष अभिलेख गरेका जम्मा १७४१ वटा घटनालाई विश्लेषण गर्दा सबैभन्दा बढी महिलाहरू घरेलु हिंसाबाट प्रभावित भएको पाइएको छ । प्राप्त तथ्याङ्कका आधारमा यस वर्ष सबैभन्दा बढी ६५ प्रतिशत (११४०) महिलामाथि घरेलु हिंसा भएको पाइएको छ । महिलाहरूमाथि हिंसा गर्नेहरूमध्ये सबैभन्दा बढी आफ्नै श्रीमान् र घरपरिवारका सदस्यहरू हुने गरेको तथ्य यस वर्षको तथ्याकंले पनि देखाएको छ । ७६ प्रतिशत (८६८) महिला आफ्नै श्रीमान्बाट र २४ प्रतिशत (२७२) महिला घरपरिवारका सदस्यहरूबाट हिंसामा परेका यस वर्षको तथ्याङ्कले देखाएको छ । यसरी घरेलु हिंसा खप्न बाध्य महिलाहरूमध्ये १७–२५ र २६–३५ वर्ष उमेर समूहका ३८–३८ प्रतिशत (४३३, ४३२) रहेका छन् भने ९० प्रतिशत (१०२१) साक्षर महिला घरेलु हिंसाबाट प्रभावित रहेको तथ्याङ्कले देखाएको छ ।
ख) सामाजिक हिंसा
यस वर्ष १७ प्रतिशत (१७४१ जनामध्ये २९५ जना) महिलामाथि सामाजिक हिंसा भएको पाइएको छ । त्यसमा ५४ प्रतिशत (१६० जना) छिमेकीबाट, १८ प्रतिशत (५४ जना) परिवारका सदस्यबाट, १० प्रतिशत (३० जना) नजिकको साथीबाट, ९ प्रतिशत (२७ जना) साथीबाट, ७ प्रतिशत (२० जना) कुनै पनि सम्बन्ध नभएका व्यक्तिहरूबाट, २ प्रतिशत (४ जना) सेवा प्रदायक संस्थाका व्यक्तिहरू जस्तै प्रहरी, स्वास्थ्यकर्मी आदिबाट महिलामाथि सामाजिक हिंसा भएको पाइएको छ ।
ग) बलात्कार
प्राप्त तथ्याङ्कका आधारमा यस वर्ष ७ प्रतिशत (१३० जना) महिलामाथि बलात्कार र २ प्रतिशत (३७ जना) महिलामाथि बलात्कारको प्रयास भएको पाइएको छ । बलात्कारका घटनाहरूमध्ये ४६ प्रतिशत (५९ जना) महिलामाथि छिमेकीबाट, १६ प्रतिशत (२१ जना) परिवारका सदस्यबाट, १२ प्रतिशत (१६ जना) महिला आफूले आत्मीय ठानेका साथीबाट महिलाहरूमाथि बलात्कार भएको तथ्याङ्क संकलन भएको छ । यसैगरी नै सबैभन्दा बढी ३२ प्रतिशत (१२) परिवारका सदस्य, ३० प्रतिशत (११ जना) छिमेकीबाट र १९ प्रतिशत (७ जना) आफूले आत्मीय ठानेका साथीबाट महिला माथि बलात्कारको प्रयास भएको पाइएको छ । प्रभावित महिलाहरूमध्ये सबैभन्दा बढी ६३ प्रतिशत (८२ जना) बलात्कारका घटनाहरू १६ वर्षमुनिका बालिकामाथि भएको तथ्याङ्कले देखाएको छ ।
घ) यौनिक हिंसा
यसवर्ष ४ प्रतिशत (७२ जना) महिलामाथि यौनिक हिंसा भएको पाइएको छ, जसमध्ये सबैभन्दा बढी ३३ प्रतिशत (२४ जना) यौनिक हिंसाका घटना महिलाले आत्मीय साथी ठानेका व्यक्तिहरूबाटै भएको पाइएको छ । त्यसैगरी १६ प्रतिशत (१२ जना) छिमेकीबाट, १४ प्रतिशत (१० जना) साथीबाट, १०–१० प्रतिशत (७, ७) जना) शिक्षकबाट र विवाह नभएका तर संगै बसेका साथीबाट भएका यौनिक हिंसाका घटना संकलन भएका छन् । यसरी नै ७–७ प्रतिशत (५,५ जना) कुनै पनि सम्बन्ध नभएका व्यक्ति र परिवारका सदस्यबाट साथै ३ प्रतिशत (२ जना) सेवा प्रदायक व्यक्तिबाट महिलामाथि यौनिक हिंसा भएको पाइएको छ ।
ङ) हत्या
यसवर्ष संकलन गरिएका तथ्याङ्कका आधारमा १ प्रतिशत (१३) महिलाको हत्या भएको छ भने ०.३० प्रतिशत(६) महिलामाथि हत्याको प्रयास भएको पाइएको छ । हत्याका घटनामध्ये ६२ प्रतिशत (८) श्रीमानबाट, १५–१५ प्रतिशत (२, २) परिवारका सदस्य तथा छिमेकीहरूबाट साथै ८ प्रतिशत (१) आफ्नै प्रेमीबाट भएको पाइएको छ । यसैगरी श्रीमानबाट ६८ प्रतिशत (४), १६–१६ प्रतिशत (१, १) आफ्नै प्रेमी तथा अपरिचित व्यक्तिबाट महिलाहरूमाथि हत्याको प्रयास भएको पाइएको छ ।
च) बेचबिखन
०.६० प्रतिशत (११) महिला यसवर्ष बेचबिखनमा परेको तथा २ प्रतिशत (१९) महिलामाथि बेचबिखनको प्रयास भएको पाइएको छ । सबैभन्दा बढी ४६ प्रतिशत (५) अपरिचित व्यक्तिबाट, ३६ प्रतिशत (४) छिमेकीबाट, १८ प्रतिशत (२) परिवारका सदस्यबाट महिला तथा बालिका बेचबिखन भएको पाइएको छ । यस्तैगरी ३२ प्रतिशत (६) अपरिचित व्यक्तिबाट, २१–२१ प्रतिशत (४, ४) आफ्नै साथी र शिक्षकहरूबाट महिलाहरूमाथि बेचबिखनको प्रयास भएको पाइएको छ ।
छ) आत्महत्या
यसवर्ष महिला माथि भएका चरित्रहत्या, दाइजोको कारणले दैनिक रुपमा यातना, जवरजस्ती विवाह गरी आत्महत्या गर्न बाध्य बनाइएका कारणले १ प्रतिशत (१०) महिलाले आत्महत्या गरेका घटना अभिलेख भएका छन् ।