बाँके नेपालगञ्जकी निर्मला कुर्मीको हत्याको आरोप लागेका लुम्बिनी प्रदेशका सांसद बादशाह कुर्मीलाई मन्त्री बनाउने निर्णय प्रति महिला पुनर्स्थापना केन्द्र (ओरेक) काे गम्भीर आपत्ति छ । निर्मलादेवी कुर्मीको हत्याका मुख्य अभियुक्त कुर्मीलाई लुम्बिनी प्रदेशको मन्त्रीमा नियुक्त गर्नु यो मुद्दा न्यायिक प्रक्रियामा रहेका बेला राज्यले महिला विरुद्धका जघन्य अपराधलाई कसरी सरलीकरण गर्छ र दोषीलाई संरचनात्मक रूपमा संरक्षण गर्छ भन्ने ज्वलन्त उदाहरण हो ।
यस निर्णयले हिंसा पीडितहरूको न्यायमा पहुँचको दयनीय अवस्थालाई उजागर गर्दछ, जुन कुनै पनि परिस्थितिमा अस्वीकार्य छ। लोकतन्त्रका आधारभूत मूल्यमान्यता, सभ्य समाजको अपेक्षा र सार्वजनिक सरोकारले राज्य निकायमा नियुक्त व्यक्तिहरू स्वच्छ सामाजिक छवि भएको, विवादमुक्त, उच्च नैतिक चरित्र भएको र कुनै पनि आपराधिक अभियोगमा कानुनी रूपमा दोषी नहोस् भनी निर्देशन दिन्छ।
WOREC यस निर्णयको घोर भर्त्सना गर्दछ र यस्तो विवादास्पद व्यक्तिलाई मन्त्री पदबाट तुरुन्त फिर्ता लिन माग गर्दछ। यस्ता अक्षम्य गल्तीहरू सच्याइएन भने सबै मानवअधिकारकर्मीहरू एकजुट भएर विरोधमा सडकमा उत्रन बाध्य हुनेछन् ।
